Na aldea, temos unha eira central, a Aira da Moa, que é o noso maior orgullo e a verdadeira praza maior en torno á cal xira todo canto aquí acontece. Coformando un círculo, ten esta eira un conxunto de hórreos que con toda seguridade é un dos mellores de toda Galiza, algo que paga a pena ver. Onde antes había terra e se facían as bailas con gaiteiro, as  medas do centeo para logo mallar, onde se mallaban as fabas ou se picaba a leña, onde xogaban os cativos e moceaban os rapaces, agora temos un piso de pedra, unha fonte, bancos, focos de luz...A verdade é que temos mellorado moito...

                                                                                                                                                                                                                          Temos outras moitas eiras, moitos  hórreos, unha igrexa moi coqueta, unha fonte con lavadoiro, un  oratorio, concervamos antigos tanque le lavar, restauramos  muíños,  fornos, forxas, a antiga casa do cura  que serve agora de centro de  exposicións e de reunións, e tamén como base de organización do  Centro  de  Interpretación do Patrimonio, adaptamos a antiga escola     para centro social e para tanatorio, temos unha asociación cultural,  unha revista, unha asociación de veciños... Temos unha chea de cousas  nunha aldea pequeniña, pero o mellor que temos, con moito, é a xente.  Maiores e novos conforman un  grupo humano excepcional, onde as  relacións son sempre cordiais, de respeto, de colaboración( sempre hai  alguén disposto a botar unha man), onde se respira unha tranquilidade e unha unión difícil de atopar noutras aldeas. Vede unha pequena mostra de cómo se divirte a nosa xuventude...